Sa Piling ni Lola

FEU Advocate
August 30, 2025 16:41

Ako’y isang batang mistulang anino,
Laging nasa likod, palaging nakasunod.
Hindi napapansin, ‘di kailanman naging tampok,
Napag-iiwanan sa agos ng buhay, punong-puno ng poot.

Walang espesyal sa aking katauhan.
Parang kape na walang init sa araw na maulan,
Parang sabaw na walang alat o sarap,
Isang batang walang sinag, walang pangarap.

Ngunit nariyan si Lola, ang tangi kong takbuhan,
Sa gitna ng unos, siya ang aking kanlungan.
Kapag ang mundo’y hindi sang-ayon sa akin,
Yakap ni Lola ang nagpapagaan sa bigat ng damdamin.

Sa mundong tila ako’y nalilimutan,
Sa kaniyang bisig, naroon ang aking tahanan.

- Gerielle Anne Afos

(Dibuho ni Elysse Duller/FEU Advocate)